ఏపీలో సీఈసీకి వ్యతిరేకంగా కాంగ్రెస్ నిరసనలు బేజారు - షర్మిల గైర్హాజరు

కేంద్ర ఎన్నికల కమిషనర్ జ్ఞానేష్ కుమార్ రాజీనామా చేయాలని డిమాండ్ చేస్తూ కాంగ్రెస్ పార్టీ చేపట్టిన ఉద్యమం ఆంధ్రప్రదేశ్‌లో పెద్దగా ప్రభావం చూపలేదు. రాష్ట్ర అధ్యక్షురాలు వైఎస్ షర్మిల ఇటీవలి నిరసనల్లో పాల్గొనకపోవడంతో పార్టీ ఉనికి, నాయకత్వ నిబద్ధతపై చర్చ మొదలైంది.

ఓటర్ల జాబితా ప్రత్యేక సవరణ (SIR) వివాదం నేపథ్యంలో జ్ఞానేష్ కుమార్‌పై చర్యలు తీసుకోవాలని జాతీయ స్థాయిలో కాంగ్రెస్ ఒత్తిడి తెస్తోంది. ఏఐసీసీ ప్రధాన కార్యదర్శి కేసీ వేణుగోపాల్ ఆదేశాల మేరకు అన్ని రాష్ట్రాల ఎన్నికల కమిషన్ కార్యాలయాలు, జిల్లా కేంద్రాల్లో నిరసనలు చేపట్టాలని నిర్ణయించారు.

అయితే ఆంధ్రప్రదేశ్‌లో ఈ పిలుపునకు స్పందన కరువైంది. ఎన్నికల అక్రమాలపై స్వతంత్ర విచారణ జరపాలని, సీఈసీని తొలగించాలని డిమాండ్ చేస్తూ విజయవాడలోని ధర్నా చౌక్ వద్ద కొద్దిమంది నాయకులు మాత్రమే నిరసన తెలిపారు. షర్మిల ఈ నిరసనల్లో ఎక్కడా కనిపించలేదు. సమాచారం ప్రకారం, తన కుమార్తె నిశ్చితార్థం పనుల్లో బిజీగా ఉండటం వల్ల ఆమె రాలేకపోయారని తెలుస్తోంది.

రాష్ట్ర అధ్యక్షురాలే పాల్గొనకపోవడంతో మిగిలిన నాయకుల్లో ఉత్సాహం కనిపించలేదు, కేవలం నామమాత్రంగానే విజయవాడలో నిరసన ముగిసింది. ఇప్పటికే పార్టీ బలం తక్కువగా ఉన్న ఏపీలో, ఇలాంటి జాతీయ కార్యక్రమాల ద్వారా ప్రజల్లోకి వెళ్లాలని కేంద్ర నాయకత్వం భావించింది.

జాతీయ స్థాయి పోరాటంలో ఏపీ కాంగ్రెస్ స్తబ్దుగా ఉండటం అంతర్గత సమస్యలను బయటపెట్టిందని పరిశీలకులు భావిస్తున్నారు. పార్టీ కార్యక్రమాలపై షర్మిలకు ఆసక్తి లేకపోతే, ఆమె తప్పుకుని ఇతరులకు అవకాశం ఇవ్వడం మంచిదని కొందరు రాజకీయ విశ్లేషకులు అభిప్రాయపడుతున్నారు.

షర్మిల గైర్హాజరుపై కానీ, పార్టీ బలహీన స్పందనపై కానీ ఆంధ్రప్రదేశ్ కాంగ్రెస్ కమిటీ నుంచి ఎటువంటి అధికారిక ప్రకటన రాలేదు. కేంద్ర నాయకత్వ అంచనాలను రాష్ట్ర విభాగం ఎలా అందుకుంటుందో, మున్ముందు నిరసనలు ఉంటాయో లేదో వేచి చూడాలి.

గత కొన్నేళ్లుగా నామమాత్రపు ఉనికి కలిగిన ఆంధ్రప్రదేశ్‌లో, నిలదొక్కుకోవడానికి కాంగ్రెస్ పడుతున్న ఇబ్బందులను ఈ పరిణామం స్పష్టం చేస్తోంది.